საყდრისის მიდამოებში შესაძლოა კიდევ ერთი პრეისტორიული მაღარო არსებობდეს
ამობეჭდვა · 2017-11-07 08:41:12 · 193 ნახვა

საყდრისის მიდამოებში, შესაძლოა, კიდევ ერთი პრეისტორიული მაღარო არსებობდეს. ამის შესახებ განცხადებას  საზოგადოებრივი გაერთიანება „საყდრისის კომიტეტი - კულტურული მემკვიდრეობისთვის" ავრცელებს.

მიმდინარე წლის აგვისტოს ბოლოს  „საყდრისის კომიტეტს" მიაწოდეს ინფორმაცია საყდრისის კარიერის მიმდებარედ (კარიერი - საყდრისი2) ძველი გამონამუშევრების კვალის სავარაუდო  არსებობის შესახებ, რის შემდეგაც კომიტეტმა ოქროს გადამამუშავებელ კომპანია „არემჯ გოლდს" ტერიტორიაზე დაშვება  მოსთხოვა.

 "კომპანიას  უარი არ უთქვამს რადგან ფიქრობდნენ რომ ჩვენ ვსაუბრობდით საყდრისი2-ზე არსებულ საბჭოური ხანის გვირაბზე. მიუხედავად იმისა რომ ტერიტორიაზე კომპანიის თანამშრომლები წუთით არ გვტოვებდნენ. ჩვენ მოვახერხეთ და ფოტოები გადავუღეთ   რამდენიმე "საეჭვო" ადგილს. ფოტოების გადაგზავნის შემდეგ სამთო არქეოლოგმა ირინა ღამბაშიძემ გვითხრა რომ ერთ-ერთი სავარაუდოდ იყო ისტორიული შტოლნა“, - ამბობს საყდრისის კომიტეტის წევრი  დათო გულბანი.

კომიტეტმა ფოტოები კულტურული მემკვიდრეობის დაცვის ეროვნულ სააგენტოსაც მიაწოდა  და ადგილზე არქეოლოგის გაგზავნა მოითხოვა. შტოლნასთან მისასვლელი გზა უსაფრთხო არ აღმოჩნდა რის გამოც   არქეოლოგმა ობიექტის  დათვალიერება ვერ მოახერხა. 

კომიტეტის  მიმართვის შემდეგ კულტურული მემკვიდრეობის ეროვნულმა სააგენტომ კომპანია "არემჯი გოლდისგან" მოითხოვა საკითხის საბოლოო შესწავლამდე კომპანიას აღნიშნულ უბანზე სამუშაოები არ გაეახლებინა. მანამდე კი ტომას შტოლნერმა, რომელიც საყდრისის  ისტორიულ მაღაროს წლების განმავლობაში იკვლევდა, ფოტოზე დაკვირვების შემდეგ დაადასტურა რომ ერთ-ერთი მართალაც შეიძლებოდა ყოფილიყო ისტორიული შტოლნა. 

საყდრისის კომიტეტის მოთხოვნით  კულტურული მემკვიდროების სააგენტოს  გარდა  პროცესში  ეროვნული მუზეუმის არქეოლოგიური ცენტრიც ჩაერთო.

7 ნოემბერს 12 საათზე  საყდრისის კომიტეტის წევრები არქეოლოგი ირინა ღამბაშიძე, არქეოლოგიური ცენტრის დირექტორი ზურაბ მახარაძე და კულუტურული მემკვიდრეობის სააგენტოს არქეოლოგები საყდრისში ჩასვლას და შტოლნის დათვალიერებას გეგმავენ.

 

 



ავტორი: Mediamall.ge