ვინმეს დასჯა თვითმიზანი არ არის - ჯანდაცვის მინისტრი
ამობეჭდვა · 2017-11-08 12:49:00 · 94 ნახვა

ჯანდაცვის მინისტრ, დავით სერგეენკოს განცხადებით, ნარკოპოლიტიკასთან დაკავშირებით, სამინისტრო ძველ პოზიციაზე რჩება, რაც გულისხმობს იმას, რომ არ არის თვითმიზანი ვინმეს დასჯა.

ამის შესახებ სერგეენკომ მთავრობის სხდომის დასრულების შემდეგ ჟურნალისტებს განუცხადა. 

"დეკრიმინალიზაციაზე სამინისტროს პოზიცია უცვლელი რჩება. ვამბობთ, რომ ამას მართლაც კომპლექსური შესწავლა სჭირდება; რომ არ არის თვითმიზანი ვინმეს დასჯა, არამედ - ზიანის შემცირება. პოზიცია იგივეა და ეს არამც და არამც არ ნიშნავს, რომ ეს არის გადაწყვეტილების თავიდან აცილების მცდელობა. ეს არის საკითხი, რომელზეც საჭიროა ფართო მსჯელობა, რომელიც ახლა მიმდინარეობს და გულწრფელად მჯერა, რომ ისეთ შედეგს მივიღებთ, რომელიც იქნება დაბალანსებული და მიმართული ზიანის შემცირებისაკენ", - განაცხადა სერგეენკომ. 

პარლამენტში ახალ ნარკოპოლიტიკასთან დაკავშირებით, კანპროექტის განხილვის დაწყება მომავალი კვირიდან იგეგმება. კანონპროექტის ინიცირება მოახდინა საქართველოს ნარკოპოლიტიკის ეროვნულმა პლატფორმამ და ხუთმა დეპუტატმა. 

 



ავტორი: MediaMall.ge