უზენაესი სასამართლოს თავმჯდომარე მუშაობას ჩვეულ რეჟიმში აგრძელებს
ამობეჭდვა · 2017-11-10 13:58:00 · 62 ნახვა

საქართველოს უზენაესი სასამართლოსა და საქართველოს იუსტიციის უმაღლესი საბჭოს თავმჯდომარე ნინო გვენეტაძე ჩვეულ რეჟიმში აგრძელებს მუშაობას. ამის შესახებ საქართველოს უზენაესი სასამართლო ინფორმაციას ავრცელებს.

9 ნოემბერს, მედიასაშუალებებით გავრცელდა ინფორმაცია, რომ ნინო გვენეტაძე თანამდებობის დატოვებას აპირებს.

6 ნოემბერს, იუსტიციის უმაღლესი საბჭოს სხდომაზე, საბჭოს წევრების ნაწილსა და ნინო გვენეტაძეს შორის რამდენიმე საკითხის გამო უთანხმოება მოხდა. მათ შორის, საბჭოს ზოგიერთმა წევრმა უკმაყოფილება გამოთქვა, რომ ნინო გვენეტაძე ხელს არ აწერდა საბჭოს მიერ ოქტომბრის ბოლოს მიღებულ გადაწყვეტილებას, 34 მოსამართლის უვადოდ დანიშვნის შესახებ. კამათი მოჰყვა საბჭოს დამატებითი სხდომის მოწვევის საკითხსაც. უზენაესი სასამართლოს და იუსტიციის უმაღლესი საბჭოს თავმჯდომარემ, ნინო გვენეტაძემ 6 ნოემბერს განაცხადა, რომ ძალადობის მსხვერპლია და საბჭოს წევრები ცდილობენ ნების საწინააღმდეგო გადაწყვეტილება მიაღებინონ. 9 ნოემბერს, საქართველოს უზენაეს სასამართლოში გაიმართა დახურული შეხვედრა იუსტიციის უმაღლესი საბჭოს წევრების მონაწილეობით. შეხვედრის შემდეგ ნინო გვენეტაძემ ხელი მოაწერა საბჭოს გადაწყვეტილებას, 34 მოსამართლის უვადოდ დანიშვნის შესახებ.



ავტორი: MediaMall.ge