ადვოკატი დიმიტრი საძაგლიშვილი - ვინაიდან სააკაშვილი იყო წამების და არაადამიანური მოპყრობის მსხვერპლი, ბუნებრივია, უნდა გათავისუფლდეს და თავისუფლად მკურნალობის საშუალება მიეცეს
ამობეჭდვა · 22 / 11 / 2021 21:04
ადვოკატი დიმიტრი საძაგლიშვილი - ვინაიდან სააკაშვილი იყო წამების და არაადამიანური მოპყრობის მსხვერპლი, ბუნებრივია, უნდა გათავისუფლდეს და თავისუფლად მკურნალობის საშუალება მიეცეს

 

ადვოკატ დიმიტრი საძაგლიშვილის განცხადებით, მიხეილ სააკაშვილი პოლიტიკური პატიმარი და წამების და არაადამიანური მოპყრობის მსხვერპლია. საძაგლიშვილის თქმით, აღნიშნულის გათვალისწინებით, მიხეილ სააკაშვილი უნდა გათავისუფლდეს და თავისუფლად მკურნალობის საშუალება მიეცეს.

„არ უნდა დაგვავიწყდეს, რომ მიხეილ სააკაშვილი გახდა წამების და არაადამიანური მოპყრობის მსხვერპლი, რაც უკვალოდ ვერ ჩაივლის მის ჯანმრთელობაზე, მორალურ მხარეზე. პირველ რიგში, ცხადია, მიხეილ სააკაშვილი არის პოლიტიკური პატიმარი და პირდაპირი მტკიცებულებები გვაქვს ღარიბაშვილის განცხადებების სახით. ამას რომ თავი დავანებოთ, ნორმალურ ქვეყანაში, წამების და არაადამიანური მოპყრობის შემდეგ ადამიანს მისცემდნენ თავისუფალ მდგომარეობაში მკურნალობის საშუალებას და არა იმ მდგომარეობაში, რაშიც ახლა საქართველოს მესამე პრეზიდენტი იმყოფება.

ნორმალურ ქვეყანაში გათავისუფლებაც კი ხდება ადამიანის, როცა წამების და არაადამიანური მოპყრობის მსხვერპლი ხდება. გათავისუფლებაც კი ხდება თუნდაც იმ უკანონო განაჩენებით გამოყენებული სანქციების. ჩვენ დეტალურად არ გვისაუბრია ამ მექანიზმებზე, მე გეუბნებით უბრალოდ, როგორია ნორმალური ქვეყნების დამოკიდებულება ამ მდგომარეობაში მყოფი ადამიანების მიმართ და როგორი უნდა იყოს. რაც შეეხება ნიკოლოზ ყიფშიძის განცხადებას, ის არის მიხეილ სააკაშვილის პირადი ექიმი და სამედიცინო  თვალსაზრისით აფასებს ამ მოვლენებს, გააკეთა ის განცხადება, რაც გააკეთა.

ვინაიდან მიხეილ სააკაშვილი იყო წამების და არაადამიანური მოპყრობის მსხვერპლი, ბუნებრივია, ის უნდა გათავისუფლდეს და მიეცეს შესაძლებობა, რომ თავისუფლებზე მოხდეს მისი ჯანმრთელობის აღდგენა, თავისუფლად მკურნალობის საშუალება უნდა მიეცეს“, – განაცხადა დიმიტრი საძაგლიშვილმა გორის სამხედრო ჰოსპიტალში მიხეილ სააკაშვილის მონახულების შემდეგ.

ამასთან, დიმიტრი საძაგლიშვილმა აღნიშნა, რომ მიხეილ სააკაშვილი თავს ძალიან სუსტად გრძნობს.

„საქართველოს მესამე პრეზიდენტი არის ძალიან სუსტად, ეს ვიზუალურად ძალიან მარტივად აღიქმება. ველოდებოდი უკეთეს მდგომარეობას, თუმცა ის არის საკმაოდ სუსტად“, – განაცხადა დიმიტრი საძაგლიშვილმა.