ალეკო ელისაშვილი - კობახიძის შერჩევის ერთ-ერთი მიზეზი, შეიძლება, ის იყო, რომ კორუფციაში არ არის შემჩნეული, ცინიკურად ლაპარაკობს ოპონენტებზე, მაგრამ ვერ იტყვი, რომ კომპეტენტური არ არის
ამობეჭდვა · 29 / 01 / 2024 17:08
ალეკო ელისაშვილი - კობახიძის შერჩევის ერთ-ერთი მიზეზი, შეიძლება, ის იყო, რომ კორუფციაში არ არის შემჩნეული, ცინიკურად ლაპარაკობს ოპონენტებზე, მაგრამ ვერ იტყვი, რომ კომპეტენტური არ არის

 

პარტია „მოქალაქეების“ წევრის, ალეკო ელისაშვილის განცხადებით, პრემიერ-მინისტრის თანამდებობაზე ირაკლი ღარიბაშვილის ირაკლი კობახიძით ჩანაცვლებით რეალურად ქვეყნისთვის არაფერი შეიცვლება.

ელისაშვილის თქმით, შეიძლება, პრემიერად კობახიძის შერჩევის ერთ-ერთი მიზეზი ის იყო, რომ კორუფციაში არ არის შემჩნეული.

„ერთი ირაკლი მეორე ირაკლის შეცვლის და ერთი მეორეზე მაღალი რომ არის, ეს იქნება, მეტი არაფერი შეიცვლება. ვარცხნილობა აქვს კიდევ უფრო განსხვავებული. რეალურად არაფერი შეიცვლება – ისევ მოვისმენთ, რომ ეკონომიკა ყვავის, გადადუღდა და ორთქლი ამოსდის, ყველა რომ მდიდრები ვართ და მინიმუმზეა უმუშევრობა. ქვეყნისა და ხალხისთვის არაფერი შეიცვლება. როგორც ჩანს, ბიძინა ივანიშვილი მართლა ბევრ რამეში არ ერეოდა და ბევრმა ჩათვალა, რომ ბრჭყალები მოუცვდა. Ახლა უნდა, აჩვენოს, რომ მთლად პენსიაზე არ ყოფილა წასული. როცა კამერა ირთვება, კობახიძე საშინლად, ცინიკურად და აგდებულად ლაპარაკობს ოპონენტებზე, მაგრამ ვერ იტყვი, რომ კომპეტენტური არ არის. საპარლამენტო საქმიანობაში კომპეტენტური იყო. ირაკლი კობახიძე, ღარიბაშვილისგან განსხვავებით, კორუფციაში შემჩნეული არ ყოფილა. ღარიბაშვილი თვითმფრინავს სახელმწიფოს ხარჯზე დაატარებდა და შვილი დაჰყავდა უნივერსიტეტში. შეიძლება, კობახიძის შერჩევის ერთ-ერთი მიზეზი ის იყო, რომ კორუფციაში არ არის შემჩნეული“, – აღნიშნა ალეკო ელისაშვილმა.