ჩვენ ბედს ძაღლი არ დაყეფს და მეყოლოს ვარდივით პუტინი – ნიკა გვარამია
ამობეჭდვა · 03 / 01 / 2018 12:57 · 1999 ნახვა
ჩვენ ბედს ძაღლი არ დაყეფს და მეყოლოს ვარდივით პუტინი – ნიკა გვარამია

თეირანში, მეშჰედში, ისპაანსა და ირანის სხვა დიდ ქალაქებში მასობრივი აქციები 28 დეკემბრიდან მიმდინარეობს. ირანის ხელისუფლების წარმომადგენლების განცხადებით, მიმდინარე საპროტესტო აქციების უკან აშშ, დიდი ბრიტანეთი და საუდის არაბეთი დგანან.

ირანში საპროტესტო აქციებს “რუსთავი 2”-ის გენერალური დირექტორი ნიკა გვარამია ეხმაურება.

”85 მილიონიანი ირანი თუ ცივილიზებულ სამყაროს დაუბრუნდა, ქვეყნიდან გასული და დასავლურად განათლებული და წარმატებული ყველა ირანელი (გამორჩეულად ნიჭიერი და გამჭრიახი ხალხია, ჩემი გამოცდილებით) უკან დაბრუნდა, ქვეყნის გაზის და ნავთობის საბადოები (რუსეთზე უკეთესია ორივე ხარისხობრივად და თქვენ წარმოიდგინეთ, არანაკლები მარაგებია) დემოკრატიული ცივილიზაციის სამსახურში ჩადგა, მეყოლოს ვარდივით პუტინი თავისი დერჟავიან და მისი სატელიტებიანად. თურქეთსაც შეაჯანჯღარებს რეგიონში პირველი ნომრობის დაკარგვა (რაც უპირობოდ და უსწრაფესად მოხდება) და დააბალანსებს რეგიონში მეორე და თანაზომადი გეოპოლიტიკური გრავიტაციის ცენტრის გაჩენა. სომხეთიც აუცილებლად დაფიქრდება რუსეთის ორბიტაზე დარჩენა/არდარჩენაზე და აზერბაიჯანიც მიხვდება, რომ მისი ნავთობი და გაზი აღარაა ჯოკერი, რომელიც ყველაფერზე იცვლება, დემოკრატიის ჩათვლით.

ცივილიზებულ ირანზე ეკონომიკურად უფრო სასარგებლო მეზობელი და პარტნიორი, შუძლებელია საქართველოს ყავდეს. და ცივილიზებულ ირანზე უკეთესად, ჩვენი რეგიონის აჭრილ ფაზლს ვერაფერი ვერ დაალაგებს.

ჩვენ ბედს ძაღლი არ დაყეფს, მოკლედ რომ ვთქვათ, და ამ ბედს ვისურვებ სწორედ ახალ 2018 წელს”, – წერს ნიკა გვარამია.

ტეგები