ეს კანონი ვერ მოაგვარებს იმ გამოწვევებს, რაც"საზოგადოებრივი მაუწყებელის" წინაშეა - ანა ნაცვლიშვილი
ამობეჭდვა · 14 / 02 / 2018 13:20
ეს კანონი ვერ მოაგვარებს იმ გამოწვევებს, რაც"საზოგადოებრივი მაუწყებელის" წინაშეა - ანა ნაცვლიშვილი

საქართველოს პრეზიდენტის საპარლამენტო მდივანი, ანა ნაცვლიშვილი იმედს გამოთქვამს, რომ საქართველოს საპარლამენტო კომიტეტები “მაუწყებლობის შესახებ”  საკანონმდებლო პაკეტთან დაკავშირებით პრეზიდენტის მოტივირებულ შენიშვნებს სიღრმისეულად განიხილავენ, სწორ გადაწყვეტილებამდე მივლენ და პრეზიდენტის ვეტოს გაიზიარებენ. ინფორმაციას 1tv.ge ავრცელებს.

ამ წუთებში პარლამენტის დარგობრივი ეკონომიკისა და ეკონომიკური პოლიტიკის კომიტეტი პრეზიდენტის მოტივირებულ შენიშვნებზე მსჯელობს, რომელიც “მაუწყებლობის შესახებ” კანონსა და “შესყიდვების კანონში” შეტანილ ცვლილებებს ეხება.

„დღეს საქართველოს მოქალაქეებისთვის კრიტიკულად მნიშვნელოვანია, რომ ჩვენს მოქალაქეებს ჰქონდეთ დამოუკიდებელი, ძლიერი და პროფესიონალური საზოგადოებრივი მაუწყებელი და ძლიერი კომერციული მედიასაშუალებები. სამწუხაროდ, ეს კანონი ვერ მოაგვარებს იმ გამოწვევებს, რომლის წინაშეც დღეს “საზოგადოებრივი მაუწყებელი” დგას. პირიქით, ამ კანონმა შეიძლება საერთოდ კითხვის ნიშნის ქვეშაც კი დააყენოს “საზოგადოებრივი მაუწყებლის” იდეა და არსი”, – აღნიშნა ანა ნაცვლიშვილმა.

მისი განცხადებით, ეს კანონი ძალიან სერიოზულ პრობლემებს შეუქმნის სხვა მედიასაშუალებებს, ასევე ქმნის სერიოზული კორუფციის რისკებსაც.

“ჩვენ ვხედავთ უპრეცედენტო და ძალიან ფართო კონსენსუსს სხვადასხვა აქტორებს შორის, ეს არის თავად კომიტეტი, რომელმაც არ დაუჭირა მხარი კანონპროექტს, სხვადასხვა პლატფორმაზე მდგარი და სხვადასხვა სარედაქციო პოლიტიკის მედიასაშუალებები, სამოქალაქო საზოგადოება, საექსპერტო წრეები, რომელთა კონსენსუსსაც ასახავს პრეზიდენტის ვეტო”, – განაცხადა ანა ნაცვლიშვილმა.

მისი თქმით, უპრეცედენტოა ეს კონსენსუსი და ძალიან ფართო სპექტრი საზოგადოების სხვადასხვა ჯგუფებისა, თუ ადამიანებისა თანხმდება იმაზე, რომ ეს კანონი პრობლემურია და თანხმდება ასევე არგუმენტებზე.

„აქედან გამომდინარე ვფიქრობ, რომ სურათი არის საკმაოდ ნათელი. დღეს ჩვენ შესყიდვების ნაწილზეც გვექნება კომიტეტში სიღრმისეული განხილვა და კომიტეტის წვერები დარწმუნდებიან, რაოდენ საფრთხის შემცველია მოცემული კანონპროექტის კანონად გადაქცევა”, – აღნიშნა ანა ნაცვლიშვილმა.

ტეგები