ქართველების დეპორტაცია - ავსტრიიდან ოთხსულიან ქართულ ოჯახს აძევებენ
ამობეჭდვა · 24 / 02 / 2018 10:05
ქართველების დეპორტაცია - ავსტრიიდან ოთხსულიან ქართულ ოჯახს აძევებენ

ავსტრიიდან, ტალჰაიმ-ბაი-ველსში მცხოვრები ოთხსულიანი ქართული ოჯახის დეპორტაცია იგეგმება. საქართველოში მათი დეპორტაცია ორშაბათს უნდა მოხდეს. ინფორმაციას ავსტრიის საზოგადოებრივი მაუწყებელი ORF-ზე დაყრდნობით "ინტერპრესნიუსი" ავრცელებს.

როგორც ORF აღნიშნავს, ქალაქის მერმა ანდრეას სტოკინგერმა ქართული ოჯახის მხარდამჭერი კამპანიაც მოაწყო, რათა ისინი ქალაქში დარჩნენ. ის ოჯახს მას შემდეგ იცნობს, რაც ისინი სამი წლის წინ ტალჰაიმ-ბაი-ველსში დასახლდნენ. 

„ჩვენ ასეთი ოჯახები უნდა გამოვიყენოთ. მშვენიერი ბავშვები არიან. ორივე კარგად საუბრობს გერმანულად. ისინი ინტეგრირებულნი არიან. მათი მშობლები მუშაობენ. ვერაფრით ვიგებ ამ გადაწყვეტილებას“, - განაცხადა ქალაქის მერმა. 

ორი წლის წინ ავსტრიამ საქართველო უსაფრთხო ქვეყნების სიაში ჩასვა, რაც საქართველოს მოქალაქეებისათვის თავშესაფრის მოპოვებას ართულებს. როგორც ავსტრიული პრესა წერს, ოჯახის წევრს, დედას, საქართველოში მოკვლით ემუქრებოდნენ, რაც საქართველოს დატოვების მიზეზი გახდა. ის ახლა ჰოსპიტალიზებულია მას შემდეგ, რაც თავის მოკვლა სცადა. 

აღსანიშნავია, რომ ოჯახს თავშესაფრის მიცემაზე უარი ეთქვა. ოჯახის ადვოკატმა აღნიშნული გადაწყვეტილება ადამიანის უფლებათა ევროპულ სასამართლოში გაასაჩივრა.

ტეგები