"მთლად ამას არ მოველოდი, რაც გავიგე“ - ნიკა გვარამია
ამობეჭდვა · 13 / 03 / 2018 21:22
"მთლად ამას არ მოველოდი, რაც გავიგე“ - ნიკა გვარამია

ნიკა გვარამიამ მას შემდეგ, რაც დღეს ე.წ. მატროსოვის ციხეში დეკანოზი გიორგი მამალაძე მოინახულა, განაცხადა, რომ „ეს ადამიანი სახელმწიფოსა და ეკლესიას შიგნით არსებული დაჯგუფებების მძევალია და ის პრეზიდენტმა უნდა შეიწყალოს“. 

"მთლად ამას არ მოველოდი, რაც აქ გავიგე. ეს ადამიანი არის მძევალი ქართული სახელმწიფოსა და სამწუხაროდ, ქართული ეკლესიის შიგნით არსებული დაჯგუფებების. ჩვენ ყველამ უნდა გავაკეთოთ ყველაფერი, რომ ეს ადამიანი მძევლობიდან გამოვიხსნათ. კიდევ ერთხელ ვიმეორებ, ეს ადამიანი - დეკანოზი გიორგი მამალაძე, არის ქართული სახელმწიფოს მძევალი. იგი უკანონო პატიმრობაში იმყოფება. ჩემთვის ამ წუთში სრულიად ნათელია, რომ იგი, როგორც მინიმუმ, შეწყალებულ უნდა იქნას საქართველოს პრეზიდენტის მიერ. იგი უნდა გამართლდეს საქართველოს უზენაესი სასამართლოს მიერ, მაგრამ ცხადია, ამის იმედი არა აქვს.

ჩვენ ვისაუბრეთ სტრასბურგის სასამართლოსთან დაკავშირებითაც, თუმცა, ეს გრძელი გზაა. დარწმუნებული ვარ, რომ დეკანოზი მამალაძე სტრასბურგში სასამართლოს მოიგებს, თუმცა, თუ ის მანამდე ციხეში დავტოვეთ, შეიძლება, კარგად არ დასრულდეს. ეს ადამიანი ჩვენ ყველამ ერთად უნდა გავათავისუფლოთ. იგი სასჯელს იხდის იმისთვის, რაც არ ჩაუდენია, უფრო მეტიც, იგი სასჯელს იხდის იმ დანაშაულებისთვის, რაც სხვებმა ჩაიდინეს,“ - განაცხადა ნიკა გვარამიამ.

ტეგები