"უსაფრთხოებასთან დაკავშირებული გამოწვევების წინაშე არა მარტო საქართველო, არამედმთელი მსოფლიო დგას"
ამობეჭდვა · 23 / 04 / 2018 13:20
"უსაფრთხოებასთან დაკავშირებული გამოწვევების წინაშე არა მარტო საქართველო, არამედმთელი მსოფლიო დგას"

საქართველოში უკვე მეხუთედ  ტარდება ნატო-ს საპარლამენტო ასამბლეის - Rose Roth-ის სემინარი, რომლის ფარგლებში გვაქვს შესაძლებლობა სიღრმისეულად განვიხილოთ და ვიმსჯელოთ თანამედროვე გამოწვევებზე და მათი ერთობლივად დაძლევის საშუალებებზე, როგორც შავი ზღვის რეგიონში, ასევე მთელს ევროპაში, - ამის შესახებ პარლამენტის საგარეო ურთიერთობათა კომიტეტის თავმჯდომარემ სოფიო ქაცარავამ განაცხადა. 

"საქართველო რთულ რეგიონში მდებარეობს და მას არაერთ პრობლემასთან უწევს გამკლავება. თუმცა, უსაფრთხოებასთან დაკავშირებული გამოწვევების წინაშე არა მარტო საქართველო და რეგიონი, არამედ, სამწუხაროდ,  მთელი მსოფლიო დგას. ამიტომაც, ჩვენი მთავარი ამოცანა არის მშვიდობისა და სტაბილურობის შენარჩუნება და ამ მიმართულებით მეტი ერთობლივი ძალისხმევის მიმართვა.

მოხარული ვარ, რომ უსაფრთხოებისა და ნატო-ში ინტეგრაციის მიმართულებით საქართველომ, ბოლო წლებში განხორციელებული წარმატებული რეფორმებით,  დიდი ნაბიჯები გადადგა და ნატო-ს მიერ აღიარებულ იქნა მჭიდრო და სანდო პარტნიორად, რომელიც  მთლიანად იზიარებს ალიანსის ღირებულებებს და მზად არის წევრობის პასუხისმგებლობები და ვალდებულებები იკისროს.

ჩვენ ყოველდღიურ რეჟიმში ვახორციელებთ მნიშვნელოვან რეფორმებს, ასევე ჩართულები ვართ გლობალური უსაფრთხოების ხელშეწყობის პროცესში და მზად ვართ განვაგრძოთ ეს გზა. დარწმუნებული ვარ, რომ ალიანსი სათანადოდ შეაფასებს ჩვენს ძალისხმევას და შესაბამის გადაწყვეტილებებში კიდევ უფრო წინ წასწევს ნატო-ში ჩვენი ქვეყნის გაწევრიანების საკითხს", - განაცხადა სოფიო ქაცარავამ.

ტეგები