ანაკლიის პორტის ადრეული სახმელეთო სამუშაოების 80% დასრულდა
ამობეჭდვა · 22 / 05 / 2018 14:18
ანაკლიის პორტის ადრეული სახმელეთო სამუშაოების 80% დასრულდა

ეკონომიკისა და მდგრადი განვითარების სამინისტროს ინფორმაციით, ანაკლიის ღრმაწყლოვანი ნავსადგურის პირველი ფაზის ადრეული სახმელეთო სამუშაოების 80% დასრულდა.

„ანაკლიის განვითარების კონსორციუმმა“ და სახმელეთო სამუშაოების კონტრაქტორმა „კომპანია ბლექ სი გრუპმა“ სამუშაოები წინასწარ შემუშავებული სამოქმედო გეგმის მიხედვით შეასრულეს.

ეკონომიკის სამინისტროს ცნობით, ტერიტორიაზე დასრულდა 110 ჰექტარზე ნაყოფიერი (ჰუმუსოვანი) ფენის თითქმის სრულად მოხსნა. სამშენებლო არეალის 100% გასუფთავებულია ნარჩენებისგან, მათ შორის, შენობა-ნაგებობებისა და სახიფათო ნარჩენებისგან.

„ამ ეტაპზე, პორტის ტერიტორიაზე მიმდინარეობს: 2.5 კმ-მდე სამელიორაციო არხის, მილხიდების, წყალსაქაჩი სადგურის მშენებლობა. სახმელეთო სამშენებლო სამუშაოების ყველა ეტაპის განმავლობაში გრძელდება დაკვირვება ფლორასა და ფაუნაზე, რათა მშენებლობის პროცესში მათ სათანადო გარემო პირობები შეექმნათ. ანაკლიის ღრმაწყლოვანი პორტის ტერიტორიაზე სამშენებლო სამუშოები საერთაშორისო და საქართველოში მოქმედი შრომის უსაფრთხოების სტანდარტების შესაბამისად მიმდინარეობს.

კონსორციუმის წარმომადგენლები აგრძელებენ ადგილობრივ მოსახლეობასთან შეხვედრებს მათი ინფორმირების მიზნით უსაფრთხოების წესებისა და მოსალოდნელი სამშენებლო აქტივობების შესახებ. ადრეულ სახმელეთო სამუშაოებში ჩაერთო და დასაქმდა ადგილობრივი მოსახლეობაც. ანაკლიის პორტის ადრეულ სახმელეთო სამუშაოებს ახორციელებს „კომპანია ბლექ სი გრუპი“, რომელიც „ანაკლიის განვითარების კონსორციუმმა“ 2017 წლის დეკემბერში შეარჩია. კომპანია ღია ტენდერის შედეგად, www etenders.ge-ზე გამოქვეყნებული სატენდერო დოკუმენტაციის შესაბამისად, 14 კანდიდატს შორის გამოავლინეს.

2018 წლის ზაფხულში იგეგმება პორტის ადრეული საზღვაო სამშენებლო სამუშაოების დაწყება. კერძოდ, დაიწყება რეკლამაცია, რომლის ფარგლებშიც ანაკლიაში დამაღრმავებელი გემი და სხვა საზღვაო და სახმელეთო დიდი რაოდენობით ტექნიკა შემოვა.

სამუშაოების ამ ეტაპზე მოხდება ხუთი მილიონი კუბური მეტრი მასალის ამოღება ზღვის ფსკერიდან 110 ჰექტარი ტერიტორიის რეკლამაციის მიზნით. საქართველოს პირველი ღრმაწყლოვანი ნავსადგურის პირველი ფაზის მშენებლობის დასრულება და ოპერირების დაწყება 2020 წლის მეორე ნახევარში იგეგმება“, – აღნიშნულია ეკონომიკის სამინისტროს ინფორმაციაში.

ტეგები