სენატორი მაკკეინი ქვეყნისთვის ყველაზე მძიმე დღეებში მუდამ საქართველოს გვერდით იდგა - დავით ზალკალიანი
ამობეჭდვა · 27 / 08 / 2018 17:53
სენატორი მაკკეინი ქვეყნისთვის ყველაზე მძიმე დღეებში მუდამ საქართველოს გვერდით იდგა - დავით ზალკალიანი

საქართველოს საგარეო საქმეთა მინისტრმა, დავით ზალკალიანმა ამერიკელი სენატორის, ჯონ მაკკეინის გარდაცვალებასთან დაკავშირებით, ამერიკის შეერთებული შტატების საელჩოში გახსნილ სამძიმრის წიგნში ჩანაწერი დატოვა.

დავით ზალკალიანმა სენატორ მაკკეინის გარდაცვალებასთან დაკავშირებით ღრმა მწუხარება გამოთქვა და სამძიმარი გამოუცხადა მის ოჯახსა და ამერიკელ ერს.

„პატივს მივაგებთ სენატორ მაკკეინის ხსოვნას. ყველასთვის ცნობილია, თუ რაოდენ დიდი იყო მისი სიმპათია და მხარდაჭერა საქართველოს მიმართ, ქვეყნისთვის ყველაზე მძიმე დღეებში ის მუდამ საქართველოს გვერდით იყო. მას არ დაუკარგავს საქართველოს მიმართ მხარდაჭერა 2008 წლის შემდეგაც და მუდმივად, ყველა მის საჯარო განცხადებაში, მიმართვაში ის ყოველთვის აფიქსირებდა ურყევ მხარდაჭერას საქართველოს ევროატლანტიკური ინტეგრაციის მისწრაფებების მიმართ, საქართველოში მიმდინარე დემოკრატიული პროცესების მიმართ. ბუნებრივია, ის იყო ამერიკის ერთერთი ყველაზე ღირსეული, გამოჩენილი პილიტიკოსი და ბუნებრივია მისი ხსოვნა მუდმივად დარჩება ჩვენს მეხსიერებაში.“ - განაცხადა დავით ზალკალიანმა.

ამერიკელი სენატორი ჯონ მაკკეინი 25 აგვისტოს, 81 წლის ასაკში გარდაიცვალა. იგი საქართველოს უდიდესი მეგობარი და მხარდამჭერი იყო.

 

ტეგები