რაჭა ოთხსეზონიანიკურორტი უნდა გახდეს და რაჭაში ტურისტების რაოდენობა გავასამმაგოთ - პრემიერი
ამობეჭდვა · 27 / 08 / 2018 18:43
რაჭა ოთხსეზონიანიკურორტი უნდა გახდეს და რაჭაში ტურისტების რაოდენობა გავასამმაგოთ - პრემიერი

რაჭა ოთხსეზონიანიკურორტი უნდა გახდეს და ტურისტების რაოდენობა, სულ მცირე, გავასამმაგოთ, – ამის შესახებ საქართველოს პრემიერ-მინისტრმა, მამუკა ბახტაძემ ამბროლაურში, „ფუძეობის“ დღესასწაულზე განაცხადა.

მამუკა ბახტაძემ ყველა რაჭველსა და რაჭის სტუმარს დღევანდელი დღე მიულოცა და რეგიონში განხორციელებულ პროექტებზე ისაუბრა.

„სასიხარულოა, რომ ამბროლაურში ძალიან კარგი შედეგები მოგვცა პროექტებმა, რომელსაც აქ ვახორციელებთ. მინდა, განსაკუთრებით გამოვყო „აწარმოე საქართველოში“ და საოჯახო სასტუმროების განვითარება. დღეს დავათვალიერე რამდენიმე მათგანი. ჩვენი ამოცანა უნდა იყოს, რომ ამ კუთხეში მინიმუმ გავასამმაგოთ ტურისტების რაოდენობა. შესაბამისად, მეტი გარანტიაა გასაცემი, რომ საოჯახო სასტუმროების მეტი პოპულარიზაცია მოვახდინოთ“, – აღნიშნა მამუკა ბახტაძემ.

მისი თქმით, რეგიონში 21 ინფრასტრუქტურული პროექტი ხორციელდება, საიდანაც 18 წელსვე დასრულდება.

„ამასთან ერთად, საჭიროა მეტი დინამიკა გვქონდეს სოფლის გზების მშენებლობის საქმეში. ამ თვალსაზრისით, 2019-2020 წლები იქნება მნიშვნელოვანი, რაც საშუალებას მოგვცემს, ამბროლაური და ზოგადად, რაჭა ოთხსეზონიანი კურორტი გახდეს. ეს არის დაახლოებით 15 პროცენტი პოტენციალისა, რაც ამ კუთხეში გვაქვს. შემდეგი ეტაპი იქნება შოვის და სხვა ტურისტული ობიექტების განვითარება“, – განაცხადა მამუკა ბახტაძემ.

რაჭაში სახალხო დღესასწაულ „ფუძეობას“ ზეიმობენ. „ფუძეობა 2018“ ამბროლაურის ცენტრში იმართება. ღონისძიების ძირითადი გზავნილი რეგიონიდან წასული რაჭველების საკუთარ ფუძეზე დაბრუნებაა.

ტეგები