ბადრი პატარკაციშვილის მკვლელობის მომზადების საქმე გახსნილია
ამობეჭდვა · 17 / 10 / 2018 12:35
ბადრი პატარკაციშვილის მკვლელობის მომზადების საქმე გახსნილია

საქართველოს მთავარ პროკურატურაში ბადრი პატარკაციშვილის მკვლელობის მომზადების საქმეზე განმარტება გაკეთდა.
 
საგამოძიებო უწყებაში ამბობენ, რომ ხმაურიან საქმეზე, მძიმე ბრალდებით, კუდ-ის ყოფილი მაღალჩინოსნები დააკავეს.
 
უწყების ცნობით, სამსახურეობრივი უფლებამოსილების გადამეტებისა და მკვლელობის მომზადების ფაქტზე, დაკავებულია კუდ-ის თბილისის მთავარი სამმართველოს მეორე სამმართველოს ყოფილი უფროსი გ.მ, მეორე მთავარი სამმართველოს ყოფილ მოადგილეს ლ.ქ-სა და ლ.შ-ს წარედგინა ბრალდებები.
 
პროკურორ კოკა კაციტაძის თქმით, ამოღებული ჩანაწერებიდან ერთ-ერთი კონკრეტული პირის მკვლელობის მომზადების დეტალებია შეთანხმებული.
 
"ერთ-ერთი ბრალდებულის საცხოვრებელ სახლში ჩატარებული ჩხრეკის დროს, აღმოჩენილ იქნა საქართველოს შინაგან საქმეთა სამინისტროს კუთვნილი ხმის ჩამწერი მოწყობილობა, რომელზედაც ჩატარებული ექსპერტიზით დადგინდა, რომ 2007 წლის 4 და 5 თებერვლის ორი ჩანაწერი, კონკრეტული პირის ლიკვიდაციის მომზადების საკითხს შეეხებოდა.კერძოდ, 2007 წლის 4 თებერვლის ჩანაწერში კუდის მაღალჩინოსანი გ.დ. ესაუბრება ბადრი პატარკაციშვილის დაცვის წევრს და მის გადმობირებას ცდილობს. საუბრისას გ.დ. ადასტურებს, რომ მკვლელობის მომზადების საკითხი სანქცირებულია საქართველოს იმდროინდელი პრეზიდენტის მიხეილ სააკაშვილის მიერ, რადგან ბადრი პატარკაციშვილი მათი პოლიტიკური ოპონენტი და ხელისუფლების დაუძინებელი მტერია. ჩანაწერის მიხედვით, ასევე დგინდება, რომ ლიკვიდაცია კუდმა უნდა განახორციელოს", - განაცხადა პრპოკურორმა.
 
რაც შეეხება მეორე ჩანაწერს, კაციტაძის თქმით, ის 2007 წლის 5 თებერვლით თარიღდება და მასში ასახულია ე.წ. „მოდულის“ შენობაში გამართული თათბირი, რა დროსაც კუდის მაღალჩინოსანი გ.დ., მის დაქვემდებარებაში მყოფი ასევე კუდის თანამშრომლები და ამჟამად ბრალდებულები ლ.ქ.; რ.შ. და გ.მ., პოლიტიკური სივრციდან ჩამოშორების მიზნით, ბადრი პატარკაციშვილის მკვლელობას ამზადებენ.
 
"რაც შეეხება მეორე ჩანაწერს, რომელიც 2007 წლის 5 თებერვლით თარიღდება, მასში ასახულია ე.წ. „მოდულის“ შენობაში გამართული თათბირი, რა დროსაც კუდის მაღალჩინოსანი გ.დ., მის დაქვემდებარებაში მყოფი ასევე კუდის თანამშრომლები და ამჟამად ბრალდებულები ლ.ქ.; რ.შ. და გ.მ., პოლიტიკური სივრციდან ჩამოშორების მიზნით, ბადრი პატარკაციშვილის მკვლელობას ამზადებენ. საუბრის მიხედვით, ისინი განიხილავენ პატარკაციშვილის ლიკვიდაციისთვის შესაბამისი პირობების შექმნას, მათ შორის დაცვის თანამშრომელთა სიის მოპოვების და პერსონალის შესახებ ინფორმაციის შეგროვების შესაძლებლობებს. ასევე მსჯელობენ მკვლელობის სხვადასხვა გზებზე, კერძოდ, მისი ისეთი ნივთიერებით მოწამვლაზე, რაც ბუნებრივი სიკვდილის ეფექტს გამოიწვევს. ამავე საუბრის თანახმად დგინდება, რომ ყველა საკითხი, მათ შორის ბადრი პატარკაციშვილის ლიკვიდაციის შესაბამისი მეთოდები თანხმდება კუდის იმდროინდელ ხელმძღვანელ დათა ახალაიასთან", - განაცხადა კაციტაძემ.