ანტივირუსულ პრეპარატ „ტამიფლუზე“ ფასები დაიკლებს
ამობეჭდვა · 11 / 01 / 2019 11:33
ანტივირუსულ პრეპარატ „ტამიფლუზე“ ფასები დაიკლებს

ფარმაცევტულმა კომპანიებმა ანტივირუსულ პრეპარატ „ტამიფლუზე“ ფასების დაწევა დაიწყეს. ამის შესახებ ინფორმაციას "ინტერპრესნიუსი" აცხადებს.

როგორც „ავერსის“ სააფთიაქო ქსელში აცხადებენ, პრეპარატს ისინი უკვე თვითღირებულებაზე ნაკლები ფასით ყიდიან.

„ავერსის“ აფთიაქებში “ტამიფლუს” ფასი ამჟამად 68 ლარია. რაც შეეხება მარაგებს, ამ დროისთვის პრეპარატი მხოლოდ რამდენიმე აფთიაქში გვაქვს, თუმცა, მარაგების შევსებას სამინისტროდან ორ დღეში ველოდებით. მომხმარებელს „ავერსის“ ვებ-გვერდზე პროდუქტის ძიების ველში შეუძლია ჩაწეროს პრეპარატის დასახელება და ნახავს, რომელ მისამართებზე შეეძლება „ტამიფლუს“ შეძენა“, - აცხადებენ „ავერსში“.

თავის მხრივ, როგორც „ინტერპრესნიუსს“ „პსპ“-ს მარკეტინგის და გაყიდვების დირექტორმა თორნიკე გურულმა განუცხადა, მათ სააფთიაქო ქსელშიც „ტამიფლუ“ უკვე თითქმის თვითღირებულების ფასად იყიდება.

„პრეპარატ „ტამიფლუს“ მწარმოებლისგან შესაძენი ფასი 67,26 ლარია, ხოლო ქსელში მისი გასაყიდი ფასი არის 68 ლარი. მედიკამენტი იყიდება ყოველგვარი მოგებების გარეშე. შესაბამისად, აპელირება იმაზე, რომ აღნიშნულ მედიკამენტზე ზემოგებებია, მხოლოდ მოსახლეობის შეცდომაში შეყვანას ემსახურება. „პსპ“-ს სააფთიაქო ქსელში არც პირბადეებზე და არც გაციებისა და გრიპის სამკურნალო მედიკამენტებზე დეფიციტი არაა და მომხმარებელი, როგორც წესი, ყოველთვის ყველაზე დაბალ ფასად იღებს“, - განაცხადა თორნიკე გურულმა.

ცნობისთვის, მედიკამენტ “ტამიფლუს” 10 კაფსულის ღირებულება საქართველოში 72.00 ლარიდან 99 ლარამდე მერყეობდა.

ტეგები