ირაკლი კობახიძე: დელეგაციის განსაზღვრისას პარლამენტი რეგლამენტით და შესაბამისი ასამბლეის რეგლამენტით ხელმძღვანელობს
ამობეჭდვა · 02 / 04 / 2019 20:35
ირაკლი კობახიძე: დელეგაციის განსაზღვრისას პარლამენტი რეგლამენტით და შესაბამისი ასამბლეის რეგლამენტით ხელმძღვანელობს

„როდესაც დგება დელეგაციები, ასეთ დროს პარლამენტი ხელმძღვანელობს შესაბამისი ასამბლეების რეგლამენტებით და ჩვენი შიდა აქტით - ეს არის პირველ რიგში, პარლამენტის რეგლამენტი“,- ამის შესახებ ირაკლი კობახიძემ პლენარულ სხდომაზე განაცხადა, სადაც მუდმივმოქმედი საპარლამენტო დელეგაციების შემადგენლობის განსაზღვრის შესახებ საქართველოს პარლამენტის 2016 წლის 29 დეკემბრის დადგენილებაში ცვლილების შეტანის თაობაზე იმსჯელეს.


„საპროცედურო საკითხთა და წესების კომიტეტი მოქმედებს რეგლამენტის შესაბამისად, რის საფუძველზეც განისაზღვრება ახალი კვოტები და ამის საფუძველზე, კონკრეტულ ვადებში განისაზღვრება ახალი შემადგენლობა დელეგაციებში. ამ შემთხვევაში, ჩვენ, ბუნებრივია, ვიმოქმედებთ ორივე დოკუმენტის შესაბამისად. ამის საფუძველზე გადაიხედა კვოტები და ასევე გადაიხედა პერსონალური შემადგენლობა“,- განაცხადა საქართველოს პარლამენტის თავმჯდომარემ.

მისივე განმარტებით, პარლამენტის დადგენილებას პირდაპირი იურიდიული ეფექტი ექნება, რადგან დელეგაციის განსაზღვრისას უმაღლესი საკანონმდებლო ორგანო ორი დოკუმენტით - პარლამენტის დადგენილებითა და შესაბამისი ასამბლეის რეგლამენტით იხელმძღვანელებს.


„არ არის სწორი იმის თქმა, რომ ამ გადაწყვეტილებას არ ექნება პირდაპირი იურიდიული შედეგი. იურიდიული შედეგი ექნება პირდაპირი - კერძოდ, როდესაც განისაზღვრება დელეგაცია, მაგალითად, ევროპის საბჭოს საპარლამენტო ასამბლეაში, ეს დელეგაცია განისაზღვრება ორი აქტის საფუძველზე - ეს არის პარლამენტის დადგენილება, რომელსაც მიიღებს პარლამენტი დღეს და ეს არის ევროპის საბჭოს საპარლამენტო ასამბლეის რეგლამენტი, ანუ, ორი დოკუმენტით იხელმძღვანელებს, შესაბამისად, დღევანდელ დადგენილებას ექნება პირდაპირი იურიდიული ეფექტი“,- განაცხადა პარლამენტის თავმჯდომარემ. ​

ტეგები