ისანში სამშენებლო ობიექტზე გარდაცვლილი მამაკაცი სავარაუდოდ არასრულწლოვანია
ამობეჭდვა · 16 / 07 / 2019 19:45
ისანში სამშენებლო ობიექტზე გარდაცვლილი მამაკაცი სავარაუდოდ არასრულწლოვანია

თბილისში, ისნის რაიონში, დოლაბაურის ქუჩაზე არსებულ სამშენებლო ობიექტზე გარდაცვლილი მამაკაცი სავარაუდოდ არასრულწლოვანია. საქართველოს შრომის, ჯანმრთელობისა და სოციალური დაცვის სამინისტროს შრომის პირობების ინსპექტირების დეპარტამენტის უფროსის, ბექა ფერაძის განცხადებით, აღნიშნულთან დაკავშირებით ზუსტი ინფორმაცია ამ ეტაპზე არ აქვთ, თუმცა დაუზუსტებელი ინფორმაციით, დაღუპული 16 წლისაა. ინფორმაციას საზოგადოებრივი მაუწყებელი ავრცელებს.

პირველადი მონაცემებით, სამშენებლო ობიექტზე შრომის უსაფრთხოების ნორმები დარღვეული იყო, რის გამოც დეპარტამენტმა სამშენებლო პროცესი შეაჩერა და მომხდარის შესახებ დეტალური მოკვლევა მიმდინარეობს.

რაც შეეხება სამშენებლო ობიექტზე არასრულწლოვანის დასაქმებას, ჯანდაცვის სამინისტროს შრომისა და დასაქმების პოლიტიკის დეპარტამენტის უფროსის მოადგილის, პაატა ჟორჟოლიანის განცხადებით, შრომის კოდექსში ცალსახად არის მითითებული, რომ მძიმე, მავნე და საშიშ პირობებიან სამუშაოებზე არასრულწლოვანის დასაქმება აკრძალულია. მისი განმარტებით, კომპანია პასუხისმგებელია გააკონტროლოს, არ მოხვდეს სამშენებლო ობიექტზე არასრულწლოვანი.

შინაგან საქმეთა სამინისტროში გარდაცვლილის ასაკთან დაკავშირებით ინფორმაცია არ დაუდასტურეს და განაცხადეს, რომ ინფორმაცია პერსონალური მონაცემია. ახალგაზრდა მამაკაცი დღეს დილით მშენებარე ობიექტის ლიფტის შახტში ჩავარდა და ადგილზევე გარდაიცვალა.