ბიძინა ივანიშვილი - ლანძღვა, რაც მოვისმინეთ "რუსთავი 2"-დან, ქვეყნის სირცხვილია
ამობეჭდვა · 17 / 07 / 2019 13:36
ბიძინა ივანიშვილი - ლანძღვა, რაც მოვისმინეთ "რუსთავი 2"-დან, ქვეყნის სირცხვილია

ლანძღვა, რაც მოვისმინეთ "რუსთავი 2"-დან,  არის ქვეყნის, ჩვენი კულტურისა და ქართველობის სირცხვილი, – ამის შესახებ ჟურნალისტებთან პარტია „ქართული ოცნების“ თავმჯდომარემ, ბიძინა ივანიშვილმა რუსეთის საგარეო საქმეთა მინისტრ სერგეი ლავროვის განცხადებასთან დაკავშირებით დასმულ კითხვაზე ისაუბრა.

„რა თქმა უნდა, ის, რაც მოხდა „რუსთავი 2“-ში, არის სირცხვილი, ეს არის ქვეყნის სირცხვილი, ჩვენი კულტურის სირცხვილი. ასეთი ლანძღვა, რაც მოვისმინეთ თქვენი ტელევიზიიდან, რა თქმა უნდა, მთელი საზოგადოება ამას განსჯის და განსჯის საგანია. ეს იყო სირცხვილი ჩვენი კულტურის, ჩვენი ქართველობის, ჩვენი იდენტობის. რაც გააკეთა თქვენმა ტელევიზიამ, თქვენი ტელევიზიის დირექტორმაც და მისმა ჟურნალისტმაც. რა თქმა უნდა, ეს ამას იმსახურებს. კარგია, რომ მიუხედავად „ნაციონალური მოძრაობის წევრების დიდი მცდელობისა, რომ ტურიზმი შეჩერდეს საქართველოში, ეკონომიკა დაინგრეს, ვაჭრობა გაჩერდეს, მიუხედავად ამისა, ყველაფერს ვაკეთებთ, რომ საქართველო განვითარდეს და საქართველოში ეკონომიკა აღორძინდეს“, – აღნიშნა ბიძინა ივანიშვილმა.

მისივე თქმით, ის გმობს ნიკა გვარამიასა და გიორგი გაბუნიას გამოსვლებს.

„დასაგმობია ყველა ქართველისგან. ეს იყო აბსოლუტურად არაქართველური და არაკულტურული გამოსვლა. ეს იყო სირცხვილი, რაც მათ გააკეთეს“, – განაცხადა ბიძინა ივანიშვილმა.

ცნობისთვის, სერგეი ლავროვმა რუსულ მედიასთან საუბრისას განაცხადა: „ბოლოს და ბოლოს, მნიშვნელოვანია თბილისში მთავრობამ საკუთარ თავში იპოვოს იმის ძალა, რომ ერთ-ერთი ადგილობრივი ტელეკომპანიის მიერ რუსეთის პრეზიდენტის მიმართ სამარცხვინო გამოხტომა დაგმოს“.

ტეგები