ირაკლი ღარიბაშვილი კაპელანებს შეხვდა
ამობეჭდვა · 01 / 11 / 2019 13:23
ირაკლი ღარიბაშვილი კაპელანებს შეხვდა

თელავში, მე-20 კადრირებული ბრიგადის ბაზაზე თავდაცვის მინისტრი ირაკლი ღარიბაშვილი საქართველოს თავდაცვის ძალების სამხედრო მოძღვრების ყოველწლიურ შეკრებას დაესწრო.

თავდაცვის სამინისტროს ცნობით, შეხვედრაზე კაპელანებმა მინისტრს საკუთარი საქმიანობის შესახებ მიაწოდეს ინფორმაცია და სამომავლო გეგმებზე იმსჯელეს. ირაკლი ღარიბაშვილმა თავდაცვის ძალებში სამხედრო მოძღვრების მნიშვნელოვან როლზე ისაუბრა და მათ ჯარისკაცებზე ზრუნვისთვის მადლობა გადაუხადა.

მოგვიანებით, თავდაცვის მინისტრმა კაპელანებთან ერთად ბრიგადის ტერიტორიაზე ექვსი ათასი მოწამე გარეჯელ ბერთა სახელობის ეკლესიის მშენებლობა დაათვალიერა. თავდაცვის ძალებში 35 სამხედრო მოძღვარი მსახურობს. მათგან ერთი, როტაციის წესით, ქართულ სამხედრო კონტიგენტთან ერთად ავღანეთის ისლამურ რესპუბლიკაში იმყოფება.

სამხედრო კაპელანების ძირითადი ფუნქცია პირადი შემადგენლობის მორალურ-ზნეობრივი სულისკვეთების ამაღლებაზე ზრუნვაა. მე-20 კადრირებული ბრიგადის ბაზაზე, სამხედრო მოძღვრების შეკრებას თავდაცვის ძალების გენერალური შტაბის უფროსი, გენერალ-ლეიტენანტი ვლადიმერ ჩაჩიბაია და თავდაცვის ძალების ხელმძღვანელი პირებიც დაესწრნენ.



 

ტეგები