ბასილაშვილის ეზოდან ამოღებულია ვიდეომასალა, რომელშიც ჩანს, რომ ნელი დოროყაშვილი ტერიტორიას მშვიდად ტოვებს - ადვოკატი
ამობეჭდვა · 25 / 05 / 2020 19:05
ბასილაშვილის ეზოდან ამოღებულია ვიდეომასალა, რომელშიც ჩანს, რომ ნელი დოროყაშვილი ტერიტორიას მშვიდად ტოვებს - ადვოკატი

ბრალდებული ჩოგბურთელის, ნიკოლოზ ბასილაშვილის ადვოკატის, ირმა ჭკადუას განცხადებით, ბასილაშვილის სახლის ეზოდან ამოღებულია ვიდეომასალა, რომელშიც ჩანს, რომ სპორტსმენის ყოფილი ცოლი არათუ გარბის, არამედ, ტერიტორიას ბავშვთან ერთად მშვიდად ტოვებს.

როგორც ირმა ჭკადუამ  განაცხადა, ასევე დაკითხულია არაერთი მოწმე, რომლებიც იგივეს ადასტურებს.

„კამერების ჩანაწერი ამოღებულია, საიდანაც ცალსახად დასტურდება, რომ ნიკოლოზ ბასილაშვილს და მისი ოჯახის წევრებს დოროყაშვილზე არ უძალადიათ. ეს კამერები არის ჭიშკართან და ჩანს, რომ არავინ არსად გარბის. მოწმეებიც არიან დაკითხული, თუ როგორ მშვიდად მიდის ის ბავშვთან ერთად ტერიტორიიდან“, - აცხადებს ჭკადუა.

შეგახსენებთ, ნიკოლოზ ბასილაშვილის ყოფილი ცოლის, ნელი დოროყაშვილის განცხადებით, ბასილაშვილის მიერ ძალადობის შემდეგ, მას გრძელტარიანი საგნით მამამთილი გამოეკიდა, რის შემდეგაც ყოფილი ქმრის სახლიდან ბავშვთან ერთად გაიქცა.

ინტერპრესნიუსი