ტანსაცმლის მაღაზიებში გამოსაცვლელი ოთახები არ უქმდება, თუმცა მათ 2 საათში ერთხელ დეზინფექცია უნდა ჩაუტარდეს - ჯანდაცვის სამინისტრო
ამობეჭდვა · 29 / 05 / 2020 14:38
ტანსაცმლის მაღაზიებში გამოსაცვლელი ოთახები არ უქმდება, თუმცა მათ 2 საათში ერთხელ დეზინფექცია უნდა ჩაუტარდეს - ჯანდაცვის სამინისტრო

ჯანდაცვის მინისტრის მიერ სავაჭრო მოლებსა და სავაჭრო ცენტრებთან დაკავშირებით დამტკიცებული რეკომენდაციების მიხედვით, ტანსაცმლის გამოსაცვლელი ოთახები არ უქმდება, თუმცა აღნიშნული ოთახების სადეზინფექციო ხსნარით დამუშავება 2-საათიანი ინტერვალებით უნდა მოხდეს. ასევე სრული დეზინფექცია უნდა ჩატარდეს სამუშაო დღის ბოლოს. ამის შესახებ "ინტერპრესნიუსი" წერს.

დოკუმენტის თანახმად, სავაჭრო ცენტრების შესასვლელთან თერმოსკრინინგის კამერის საშუალებით უნდა გაკონტროლდეს პერსონალის/მომხმარებლების ჯანმრთელობის მდგომარეობა ტემპერატურის გაზომვით. უნდა მოხდეს დისტანციის დაცვა. მოლის საერთო სივრცეში 10 მ2 ფართზე 1 ადამიანის, ხოლო ინდივიდუალური ფართით მოსარგებლეთა სივრცეში 5 მ2 ფართზე 1 ადამიანის დაშვება უნდა მოხდეს. ამასთან, მოლის სივრცეში მომხმარებლები პირბადის გარეშე არ დაიშვებიან.

ამასთან, რეკომენდაციაა, რომ მოხდეს უსაფრთხო ვენტილაცია გარედან შემოსული ჰაერით.